بقلم:أشجان الجعلي

بكره كان اول يوم في الجامعه وانا قاعده في غرفتي سامر جا دق لي الباب قلت اتفضل دخل قال لي بكره محاضرتك الساعه كم ???? قلت ليهو وانت بتخصك في شنو ???? قال لي أبدا ما بتخصني بس حبيت اعرف جدولك عشان كان مع زمني اوصلك قلت ليهو لااا شكرا لخدماتك قال لي بالمناسبه اوعي تفتكري ح اوصلك عشان سواد عيونك بس عشااان خاطر عمتي و وصيتها عليك قلت ليهو وصيتها احتفظ بيها لروحك وسواد عيوني ما عندك علاقه بيهو قال لي كدا عداني العيب وعملت العلي وطلع تاني اتزكرت انو ما بعرف طريق الجامعه فتحت الباب قلت ليهو اسمع يا أخ انت اتلفت علي من غير كلام قلت ليهو محاضرتي السـ 8ــاعه وح امشي معااااك عشااان خاطر ماما زي ما قلت اداني ابتسامه مستفزه ودخل غرفتو حيوااان ???? 

اصبحنا الصباح لبست اسكرتي قصير بترولي مبين الحجل وقميص بيجي وطرحه بيجيه واسبورت بيجي وعندي حجل لذييييذ لبستو  وجيت طالعه وكان كلهم قاعدين يشربو في الشاي سمر قالت لي تعالي اشربي معانا قلت ليها لااا شكرا ???? حبوبه قالت لي يا بتي ما تطلعي في البرد ده من غير شاي الا تشربي  حتي تطلعي وسامر لسه ما طلع ناولتني الكبايه وانا بشرب سامر جا قال لينا انا وسمر اطلعو ارح حبوبه قالت ليهو خلي شجن تكمل الشاااي حقها قال ليها كان عايزه تشرب بمزاج كان تقوم بدري بس انا ما عندي زمن عشااان انتظرها ???? ختيت الكبايه قلت ليها ما مشكله يا حبوبه كفايه النص الشربتو جينا طالعين سامر قال لي دقيقه دقيقه ماشه الجامعه كده ???? قلت ليهو كده كيف يعني قال لي بي لبسك ده قلت ليهو اي عندك مااانع ???? قال لي ما بتطلعي بشكلك ده قلت ليهو انت منو عشااان توريني اطلع كيف قال لي بما انك طالعه من البيت ده يبقي انا ولي امرك قعدت اضحك قلت ليهو بتحلم تبقي ولي امري شكلك نسيت نفسك بابا الوحيد الولي امري عشااان كده الدور ده ما تعيش فيهو ???? حبوبه قالت لينا يا اولاد خلاص ما ترفعو لي السكري قلت ليها والله يا حبوبه لو اترفع يبقي ولد ولدك السبب سمر قالت لي خلاص يا شوشو قلت ليها لااا ما خلاص وبعدين للمعلوميه انا ما مبسوطه في القعاد هنا قاعده عشان خاطر ماما وحبوبه وقاعده بشرط انو مافي زول عندو دخل بي قال لي تمااام وقت الحكايه كده تاني شوفي ليك زول يوصلك لانو ما بركب معاااي وحده باللبس ده قلت ليهو As you like وطلعت علي الباب وكنت خايفه لاني ما عارفه الجامعه بوين جا طالع قال لي اركبي عشان  حبوبه حلفتي اسوقك ما اكتر ???? قلت ليهو لاااا قال لي تمااام عايز يتحرك فتحت الباب ركبت قلت ليهو ما تشيل هم بس الليله عشان ما بعرف طريق الجامعه سفهني ما رد لي سمر راكبه قدام وانا ورا كان كل مره يجر لي نور بالمرايه وفضلنا ساكتين لحدي ما وصلنا الجامعه نزلت وقفلت باب العربيه بقوتي كلها قال لي ما كان تشيلي معاك فد مره ???? قلت ليهو المره الجايه بقلعو وبسلمك ليهو في يدك ???? قال لي مش لم تكون في مره تانيه قصف جبهتي الحيوان ...

دخلت الجامعه ولفت الانظار من اول يوم ......

بابا مديني ثقه في روحي لدرجه الغرور حتي في الجامعه كنت بشوف انو مافي زول يستاهل اني اصاحبو كنت منكمشه من الناس عامله لروحي دنيا براااي عااايشه فيها واصلا داخله الجامعه وبطني طامه منها  بحضر المحاضرات وفي وقت الفراغ بكون مركبه سماعتي وفاتحه اغاني جا واحد قال لي ممكن نتعرف علي البرنسيسه نزلت فردة سماعه قلت ليهو نععععم عاد لي نفس الكلام قلت ليهو لااا ???? قال لي لييه الاحرج ده علي العموم انا اسمي مجتبي قلت ليهو ولو قعدت معاااي ح تلقي مزيد من الاحراج اديتو نظره استحقار وركبت سماعتي راجعه .. انسحب برااااحه رجع لي شلتو ضربت لي ماما قالت لي شجن حبيبتي  الجامعه كيف قلت ليها زي الزفت قالت لي معليش ح تتعودي قلت ليها قصدك تموتي بس المصبرني عليها انو ح ادرس فيها بس سنه وح اجيكم راجعه ???? قالت لي ما عندك مشكله بس شدي حليك في السنه دي ???? اتونست معاي وقفلت الخط ...

اخر الدوام بعد نهايه المحاضرات طلعت خارج الجامعه منتظره سامر يجيني تاني اتزكرت اني شاكلتو وقلت ليهو تاني ما يوصلني وطبعا انا من النوع الـ ما بتنازل من قرارو مهما حصل انا واقفه في الظلط عايزه امجاد جا الولد القبيل القال اسمو مجتبي وقف عربيتو جنبي نزل القزاز قال لي هنا مافي مواصلات اركبي اوصلك قلت ليهو لو عربيتك دي اخر وحده ما تحلم اني اركب معاك ???? قال لي للدرجه دي عندك مشكله مع الاولاد قلت ليهو لا عندي مشكله بس مع المتطفلين الزيك دور عربيتو واتحرك ...

وقفت امجاد قال لي ماشه وين قلت ليهو بيتنا قال لي اي قصدي بيتكم وين يعني قلت ليهو في العمارات قال لي شارع كم قلت ليهو طيب دقيقه اتصلت علي حبوبه قلت ليها هاك وصفي لعمو ده البيت واديتو التلفون وصفت ليهو بقي سايق ويدردش معاي قال لي شكلك ما من السودان قلت ليهو يب قال لي اااي ظاااهر يا بتي نصيحه مني ليك احزري من مجتمع الجامعه وخليك بت واعيه ما تتغشي وبقي يتكلم لي عن حوادث الجامعه لحدي ما وصلت البيت لما جيت انزل ودفعت ليهو القروش قال لي موفقه يا بتي قلت ليهو عمو رايك شنو ترحلني يومي ولو عندك ارتباطات تانيه خلاص قال لي يا بتي ارتباطات من وين نحن ناس رزق اليوم باليوم قلت ليهو اتفقنا خلاص بكره تعال لي الصباح وشلت رقم تلفونو واديتو رقمي لانو بالجد حسيت معاهو بالامان دخلت البيت سلمت علي حبوبه وعلي طول طلعت غرفتي بعد شويه جات سمر قالت لي يلا الغدا قلت ليها انا اتغديت قالت لي اتغديتي وين  قلت ليها في الجامعه  قالت تمام ونزلت وانا ما طلعت من غرفتي خااالص جاتني حبوبه قالت لي شجن مالك ما بتنزلي تتونسي معانا قلت ليها عندي قرايه قالت لي بسم الله متين بديتو قلت ليها حابه ادرس اول باول وبعدين عشان ما اضايق ولد ولدك قالت لي بطلو شغل الشفع ده وبعدين والله سامر طيبان بس انتي عشان ما بتعرفيهو قلت ليها ولا حابه اعرفو قالت لي الزمن بثبت ليك قعدت اتونست معاي وطلعت وجا العشا كذلك جابو لي في غرفتي ما قعدت معاهم

اصبحنا اليوم التاني كنت لابسه اسكرتي طويل لونو اسود بس الخطوه  ما شاء الله ولابسه الحجل ده اهم حاجه عندي في اللبس وقميص كبدي وطرحه مشكله بالكبدي ولبشاين كبدي جيت طالعه لقيت سامر قاعد  شغال يحمر لي ولا اشتغلت بيهو سلمت علي حبوبه وانا طالعه سامعه بقي يتكلم مع حبوبه قال ليها البت دي يوم برتكب فيها جريمه احسن تكلميها تحسن مظهرها ده وتحترم نفسها جيتو راجعه رديت ليهو انا محترمه غصباً عنك عايز يضربني كف حبوبه صرخت رجع يدو قلت ليهو كان تضربني عشان ترجع ليك مكسورهضرب التربيزه برجلو  وطلع وانا بكل برود طلعت لقيت عمو  منتظرني برا ركبت وصلني الجامعه دخلت القاعه جا الزفت الاسمو مجتبي يتظارف قعد جنبي في البينش قال لي البرنسيسه ما ناويه تعرفنا قلت ليهو لا انت بالجد المفروض تدخل موسوعه جينس في الزناخه قال لي لو ده رايك ما عندي مشكله بس ما ناويه تهدي لي رقمك قلت ليهو لو بي يدي كان هديت ليك بف باف يبيدك ولأ ديتول يخليك من ضمن فصيلتك الـ 99. 9% قال لي راضي بس بشرط اموت علي يدك قلت ليهو لا بالجد انت مريض نفسي قمت من جنبو قعدت في البينش التاني جاتني وحده سلمت علي قالت لي ملاحظه انو مجتبي بضايقك لكن ما تشتغلي بيهو قلت ليها ده واحد غبي اصلا ما شغاله بيهو واتعرفنا علي بعض اسمها سلمي دي الوحيده الصاحبتها من الدفعه قالت لي شكلك قرفانه من الجامعه قلت ليها بالظبط كده عشان دخلتها مجبوره قالت لي طيب رايك شنو اعرفك علي باقي الـدفعه لو صاحبتي ناس كتيره بخفف عليك قلت ليها لااا كفاااي انتي قالت لي تسلمي لي 

بعد نهايه الدوام رجعت البيت لقيتهم كلهم ملمومين يتونسو ويشربو في شاي المغرب كالعاده سلمت عليهو وعلي طول طلعت غرفتي سمر جاتني وجايبه معاها كبايتين شاي قلت ليها ما كان في داعي قالت لي قلت نشرب ونتونس واثناء الونسه قالت لي والله يا شجن سامر عمل كده عشان خايف عليك بس ما قصدو يهينك قلت ليها خوفو يحتفظ بيهو لنفسو انا بـ مية راجل ما محتاجه لزول يخاف علي وبعدين انتي بكفه وهو بكفه قالت لي حاولو اتعرفو علي بعض وقللو النقاشات بينكم عشان خاطر حبوبه تعبانه بينكم قلت ليها باستهتار ما عندك مشكله بس كلامك ده قولي ليهو ما لي انا قالت لي تمااام وطلعت خلتني. .

في يوم وانا في الجامعه اتصل علي رقم غريب رديت الو قال لي البرنسيسه طبعا من الصوت عرفت انو ده مجتبي وهو قاعد في البنش وراي قفلت الخط واتلفت عليهو دقيت ليهو البينش قلت ليهو كيف تتجرأ تتصل علي وبعدين جبت رقمي من وين قال لي اعصابك يا برنسيسه انا ما في حاجه بتخفي علي بس ده رقمي سجليهو للزمن وابتسم قلت ليهو اسجل رقم داعش ولا اسجل رقمك وخلي عندك حبه كرامه وخليك راجل واختاني طبعا اصحابو بقو يشاغلو فيهو نظام انا احرجتو وكده طلع بره القاعه جات سلمي قالت لي مالك قلت ليها ده الغبي الاسمو مزفت ده ما عارفه جاب رقمي من وين قالت لي ما تنفعلي احظريهو بس اصلا هو غياااظ قلت ليها بس كل مره يخرب لي المود حقي  طبعا الجامعه كلها سيرت علي اسم البرنسيسه بعد نهايه المحاضرات طلعنا من الجامعه لقيت عمو واقف بره ونحن في الطريق قال لي يا بتي قبيل زميلك جا شال مني رقمك قال بفتش فيك في الجامعه وما لاقيك وقال عايزك ضروري عشان كده اديتو رقمك ان شاء الله ما اكون غلطته بقلبي قلت ليهو لييه عملت كده يا عمو ما كان تديهو الرقم قلت ليهو ما مشكله حصل خير وصلت البيت وكان نفس الروتين القاتل مقضيه كل وقتي في الغرفه يا بدرس يا بدردش بالواتس مع صحباتي في الامارات يا جاتني سمر وبنتونس مع بعض 

اصبحنا اليوم التاني مشيت الجامعه بس المره دي مجتبي كان متغير ما قرب علي ولا حاول يضايقني بس بصراحه كنت حاسه انو في حاجه ناقصه بس ما اهتميت عدينا يومين ونحن نفس الروتين و اليوم التالث كان غايب من الجامعه وانا بالجد كنت فاقداهو بالرغم من مضايقتو لي كنت طول اليوم بفتش ليهو بعيوني بس ما جا 

رجعت البيت وانا متضايقه وبقيت افكر اتصل عليهو ولأ لااا تاني قطعت الشك باليقين و قررت

... يتبع