بقلم:أشجان الجعلي

الطياره اقلعت وصلنا السودان وكان منتظرنا سامر سلم علي ماما وحمودي ولم جا يسلم علي مد لي يدو وبقي يعاين لي من فوق لـ تحت  نظام ده شنو اللابسه ده بس اعجبكم ما اشتغلت بيهو مديت ليهو طرف يدي واديتو ابتسامه بـ سخريه ????   .....

ركبنا العربيه ماما ركبت قدام وانا وحمودي ورا وسامر شغال يتونس مع ماما ويحمر لي بالمرايه ???? اول ما عاين لي قلت ليهو تقريبا نحن ما جايين ننتحر هنا عشان كده يا ريت لو تعاين قدامك وانت سايق ???? شكلو اتحرج بس يستاااهل طبعا ماما قبلت علي ورا نهرتني قال ليها خليها يا عمتي شجن دي اصلا معزوره ???? قلت ليهو كيف معزوره يعني شايفني مجنووونه ولا مجنووونه ???? امي قالت لي شجن احسن تسكتي ???? واعتزرت لـ ولد اخوها ???? يا حليلك يا بابا بتك بتتبهدل وراك وصلنا البيت وكانو كلهم منتظرننا خالتو رشا و ولدها احمد وحبوبه وسمر بنت خالي اخت سامر .. ورحبو بينا بي حراره وداك يا السلام بس طبعا انا لا عاجبني العجب لا الصيام في رجب سمر قالت لي شوشو يا سلام ياااخ ح تقري معانا هنا قلت ليها للاسف  احمد قال لي لييه بس تكرفسي مشاعرنا بكلمة للاسف دي ???? ياااخ لو ما شالتك الارض نشيلك في عيونا بقلبي قلت ليهو اممممم ظريف بس اكتفيت ارد ليهو بـ إبتسامه ???? سمر قالت لي اخيراً ح ألقي لي اخت تونسني كنت قاااعده وسط احمد وسامر براااي وحاقرين بي قلت ليها بس ما تفرحي كلها سنه وراااجعه قالت لي بالجد لييه  سامر بتحت قال احسن بس انا سمعتو حيوان خلااص ???? وامي شغاله تحمر لي ... بعد كملو ونستهم حبوبه قالت لينا اطلعو ارتاحو حضرنا ليكم الغرفه قالت لـ سامر ارفع ليهم الشنط اديتو ابتسامة انتصار نظام بتخدم فينا وكده طلعت لقيتو خت الشنط جنب الباب قلت ليهو شنطتي دي فيها حاجات حساسه ما تكون كسرتها لي ما رد لي صر لي وشو وعيونو بقت شرار شرار وطلع وانا اصلا كضااابه ما عندي حاجه بتتكسر بس حبيت انرفذو امي جات لاحقاني في الغرفه قالت لي شجن لو ما حسنتي اسلوبك ومعاملتك دي ح تفضلي طول عمرك هنا ما ح ترجعي الامارات قلت ليها طيب اجدعوني هنا لم اموت وترتاحو مني قالت لي لو السودان بقتل ما كان في زول قاعد فيهو  قلت ليها بعدين انا ح اقعد هنا بس اسبوع لحدي ما انتي ترجعي بعديها ح افتح شقتنا واقعد فيها قالت لي كيف يعني تقعدي براك ???? قلت ليها بقعد براااي قالت لي لا ما تفكري هسه اولاد خالك ما قاعدين هنا قلت ليها خلاااص تسجليني في داخليه بس هنا ما بقعد يا أرجع معاك قالت لي خلاص نشوف داخليه كويسه.. 

اعرفكم علي ناس السودان طبعا ده البيت الكبير خالو يوسف مغترب في الدوحه عشان كده سمر وسامر زيي قاعدين مع حبوبه عشان الجامعه وسامر بقرأ طب اخر سنه ويعتبر كبير البيت عشان كده فارض سيطرتو  اما شقتنا وشقة ناس خالتو رشا (ام احمد) في نفس العماره والعماره فاتحه قصاد البيت الكبير يعني في حي واحد وشبه ساكنين كلنا هنا لانو 24 ساعه بكونو كلهم مجتمعين في البيت الكبير  ...

ماما طلعت تتم ونستها مع امها واختها رشا وانا فضلت قاعده في الغرفه بعد شويه جات سمر قالت لي انزلي العشا قلت ليها ما عندي نفس  حنستي بس اصريت ما انزل

امي جات قالت لي يا شجن ما ح تقعدي في داخليه قلت ليها كيف يعني طيب ح اقعد وين قالت لي ح تقعدي هنا لانو امي زعلت لم قلت عايزه اسجل في داخليه قلت ليها بس يا ماما ده ما كان اتفاقنا 

قالت لي اصلا البيت كبير وما فيهو زول غير حبوبتك واولاد خالك سمر وسامر وكل واحد فيكم بغرفتو يعني ما في حاجه ح تزعجك قلت ليها المشكله في سامر زاتو ما بطيقو وما بطيقني كل مره قالب خلقتو فيني قالت لي انتي حسني معاملتك معاهو وبعدين هو اخوك يعني ضهرك وسندك قلت ليها لاااا انا سندي بس بابا  قالت لي وفي حل تاني لو ما عايزه تقعدي هنا امشي اقعدي مع عماتك قلت ليها عماتي لاااا امري لله ح اقعد هنا  بس كلميهم يعتبروني كأني ما موجوده قالت لي قصدك شنوووو  قلت ليها يعني اي زول في حالو قالت لي تمااااام بس حاولي اتقربي منهم ديل اهلك قلت ليها لا ديل اهلك انتي انا اهلي انتي وبابا وحمودي قالت لي احسن تبطلي طولة لسان  ....

اصبحنا الصباح جونا عماتي يسلمو علينا عمتو سعاد قالت لي بيتنا مفتوح ليك في اي لحظه واصلو ما تشيلي هم انتي وسط اهلك قلت ليها تسلمي يا عمتو كلك ذوووق اما عمتو نفيسه شغاله بس تقلب لي في عيونه لا بتحبني لا بتحب ماما  لو ما عيب وعشان خاطر بابا كان اديتها حقها  بالكلااام 

 المهم في فترة الاسبوع دي ماما كانت بتمشي معاااي الجامعه لحدي ما انتهيت من التسجيل وانتهي الاسبوع وماما وحمودي مسافرين بقت توصي فيني و قالت لـ سامر خلي بالك منها دي اختك الصغيره قال ليها ما في عوجه شلت حمودي ودعتو قلت ليهو حمودي خليك كده اوعك تكبر عشان ما يدفنوك هنا زيي بعد ركبو العربيه انا شغاله ابكي   احمد قال لي والله يا شجن زكرتيني الشافعه الامها بتوصلها الروضه اول يوم وتمشي تخليها بتبكي زيك كده قشيت دموعي حمرت ليهو  وطلعت غرفتي جاتني سمر قالت لي والله يا شوشو انا في الاول كنت زيك كده بس تاني اتعودته وبقيت احب اقعد هنا اكتر من قطر انتي هسه بتبكي عشان حاسه بروحك براااك بس انا في وبكره تعملي صحبات وتتعودي علي الوضع بقلبي قلت ليها بس اختوني انتو وانا ببقي كويسه تاني جات حبوبه بقت تسكت فيني

هديت حبه بس كنت مصدعه ادوني حبوب بلعتها ونمت بعد يومين نزلت الجامعه .....

يتبــــع ⏪⏪⏪⏪